OneDrive’dagi yangi funksiya: qulaylikmi yoki xavfmi?
Microsoft kompaniyasi OneDrive bulutli saqlash xizmatiga joriy oyning o‘zida yangi funksiya qo‘shdi — “Shaxsiy akkauntni avtomatik ulash” (“Prompt to Add Personal Account to OneDrive Sync”). Bu yangilik dastlab qulaylikdek tuyuladi: foydalanuvchi shaxsiy Microsoft akkauntini ishchi qurilmadagi OneDrive bilan sinxronlashtirishi mumkin. Ammo axborot xavfsizligi mutaxassislari bu funksiyaning salbiy oqibatlaridan jiddiy xavotirda.
Microsoft 365 yo‘l xaritasida keltirilishicha, bu funksiya OneDrive ilovasini ishga tushirganingizda avtomatik tarzda shaxsiy akkauntingizni aniqlaydi va uni ish OneDrive’ga bog‘lashni taklif qiladi. Eng xavflisi — bu imkoniyat standart holatda yoqilgan bo‘ladi. Agar foydalanuvchi hech qanday ogohlantirishsiz “Ha” tugmasini bossa, ish fayllari shaxsiy akkaunt bilan sinxronlashadi. Bu esa korporativ ma’lumotlarning nazoratsiz muhitga — shaxsiy bulutga — ko‘chib o‘tishiga olib keladi.
IT mutaxassislari aytishicha, bu holatda na jurnal yuritiladi, na korporativ siyosat tatbiq qilinadi. “Birgina foydalanuvchi noto‘g‘ri tugmani bossa, butun biznes ma’lumotlar shaxsiy akkauntga o‘tadi. U yerdan esa istalgan kishiga ulash mumkin”, — deydi bir xavfsizlik muhandisi.
Korporativ muhofaza uchun nima qilish kerak?
IT administratorlar quyidagi ikki asosiy siyosat orqali bu xavfni kamaytirishlari mumkin:
- DisableNewAccountDetection – yangi akkauntlar aniqlanishini cheklaydi, ammo foydalanuvchi o‘zi qo‘lda sozlashda davom etadi.
- DisablePersonalSync – shaxsiy OneDrive akkauntlarining korporativ qurilmalarda sinxronlashini butunlay taqiqlaydi.
Xavfsizlik bo‘yicha mutaxassislar, jumladan Microsoft MVP Simon Hartmann Eriksen, ikkinchi variantni qat’iy tavsiya etishmoqda. U LinkedIn’dagi postida shunday deydi: “Barcha Endpoint administratorlari uchun — ‘Foydalanuvchilarga shaxsiy OneDrive akkauntlarini sinxronlashtirishni taqiqlash’ siyosatini faollashtiring”.
Foydalanuvchilar fikri va so‘nggi tavsiyalar
Ayrim tizim administratorlari bu yangilikdan g‘azabda. “Biz OneDrive’ni joriy qilganimizdan beri shaxsiy akkauntlarni o‘chirib qo‘yganmiz. Microsoft esa uni endilikda avtomatik yoqmoqda. Bu juda achinarli holat,” — deydi ular.
Boshqalar esa bu qarorni kinoya bilan qarshi oldi: “Microsoft, mijozlar korporativ hujjatlarini tanishlar ro‘yxatidagi barchaga ulashishni juda-juda xohlashadi shekilli!”
Kompaniyalar hozirdan boshlab OneDrive siyosatini qayta ko‘rib chiqishlari va kerakli choralarni ko‘rishlari zarur. Bu kichik yangilik ortida korporativ axborot xavfsizligiga jiddiy tahdid yashiringan.
