DIQQAT, DIQQAT!!! YANGI FIRIBGARLIK SXEMASI ANIQLANDI!
Hurmatli fuqarolar, ijtimoiy tarmoqlarda yangi firibgarlik sxemasi orqali plastik kartadan pul undirish holatlari kuzatilmoqda. Ushbu yangi firibgarlik sxemasi quyidagicha amalga oshiriladi:
Firibgarlar ijtimoiy tarmoqlar yoki messenjerlar (Facebook, Telegram, WhatsApp va h.k.lar) orqali siz bilan aloqaga chiqadilar hamda ma’lum bir pul evaziga soxta mehmonxonaga ovoz berishingizni va ijobiy sharh yozib qoldirishingizni so‘rab, soxta mehmonxonaning veb-sahifasiga havola yuboradilar.
Mazkur havola orqali veb-sahifaga kirganingizdan so‘ng, mehmonxonaga ovoz berish va sharh qoldirish uchun avvaliga ushbu mehmonxonadan xona bron qilishingiz hamda VISA yoki UZCARD karta ma’lumotlaringizni kiritish so‘raladi. Tabiiyki, plastik karta ma’lumotlarini kiritganingizdan so‘ng, telefon raqamingizga yuborilgan bir martalik SMS-kodni kiritishingiz talab etiladi.
Shu yo‘l orqali firibgarlar plastik kartangizdagi pullarni yechib olish imkoniyatiga ega bo‘ladilar.
Ma’lum bir hollarda firibgarlar soxta mehmonxonaga ovoz berganingiz va ijobiy sharh qoldirganingiz uchun sizga ma’lum bir miqdorda mukofot pulini plastik kartangizga tashlab berishlari ham mumkin. Albatta, firibgarlarning maqsadi shu yo‘l orqali sizda ularga bo‘lgan ishonchingizni yanada oshirishdir.
Ammo bunday firibgarliklarga uchramaslik va ogoh bo‘lishingizni so‘raymiz. Shu bilan birga, quyidagi tavsiyalarga amal qiling:
- Begonalarga bir martalik SMS-kodlarni bermang;
- Shubhali yoki zararli havolalarni hamda fayllarni ochmang;
- Rasmiy va ishonchli axborot resurslaridan foydalaning.
