Tadqiqotchilar WAF himoya tizimini chetlab o‘tishning yangi usulini aniqlashdi

Kiberxavfsizlik sohasidagi mutaxassislar Web Application Firewall (WAF) tizimini chetlab o‘tishning murakkab usulini namoyish etdilar. Ushbu usul JavaScript injeksiyasi va HTTP parameter pollution texnikasini birlashtirish orqali amalga oshiriladi va u zamonaviy veb-xavfsizlik infratuzilmasidagi jiddiy zaifliklarni ochib berdi.

Zaiflik qanday aniqlangan?

Tadqiqot avtonom penetratsion test jarayonida olib borilgan. Tadqiqotchilar ASP.NET ilovasida oddiy XSS (Cross-Site Scripting) zaifligini topishdi. Odatda WAF bunday zaifliklarni samarali bloklaydi, ammo bu safar ASP.NET’ning parametrlarni qayta ishlashdagi o‘ziga xos xatti-harakati kutilmagan imkoniyat yaratdi.

Microsoft hujjatlarida qayd etilishicha, HttpUtility.ParseQueryString() usuli bir xil nomli bir nechta parametr qiymatini vergul bilan birlashtirib yuboradi. Masalan:

param=val1&param=val2 → param=val1,val2

Shu tafovutdan foydalanib, tadqiqotchilar WAFni chalg‘itib, bir nechta “zararsiz” ko‘ringan parametrlar orqali bitta ishlaydigan zararli JavaScript kodini yig‘ishga muvaffaq bo‘lishdi.

Masalan:

/?q=1'&q=alert(1)&q='2

ASP.NET qayta ishlagach:

1',alert(1),'2

Natijada — sintaktik jihatdan to‘g‘ri JavaScript kodi, u esa alert(1) ni bajaradi.

Tadqiqot natijalari

Mutaxassislar 17 ta turli WAF konfiguratsiyasida sinov o‘tkazib, muhim xulosalarga kelishdi:

  • Oddiy injeksiya urinishlari faqat 17,6% hollarda WAFni aldadi.
  • Parameter pollution va murakkabroq texnikalar bilan bu ko‘rsatkich 70,6% gacha ko‘tarildi.
  • Ba’zi mashhur WAF tizimlari, jumladan Azure WAF, maxsus yaratilgan “escape” belgilari bilan bog‘liq payloadlar yordamida chetlab o‘tildi.

Asosiy zaiflik sabablari:

  1. Parametrlarni alohida tahlil qilish, ularning o‘zaro bog‘liqligini hisobga olmaslik.
  2. Dasturiy ta’minotga xos parsing jarayonini simulyatsiya qilmaslik.
  3. Klassik XSS signaturalariga suyanish, ammo turli shakldagi ekvivalent payloadlarni e’tibordan chetda qoldirish.

Xavf qanchalik jiddiy?

Bunday hujum usuli oddiy foydalanuvchi xatosiga emas, balki WAF va ilova framework’lari o‘rtasidagi tafovutga asoslanadi. Ya’ni foydalanuvchi hech qanday xato qilmagan bo‘lsa ham, tizim avtomatik ravishda xaker foydasiga ishlashi mumkin.

Buning oqibatida:

  • Xakerlar qat’iy WAF himoyasini ham chetlab o‘tib, zararli kodni ishga tushirishlari mumkin.
  • Bu esa ma’lumotlar o‘g‘irlanishi, sessiyalarni egallash va boshqa turdagi hujumlarga yo‘l ochadi.

Mutaxassislar tavsiyasi

  • WAF ishlab chiquvchilari tizimlarni framework-spesifik parsing qoidalari bilan boyitishi kerak.
  • Kontekstni hisobga olgan chuqur tahlil algoritmlarini joriy etish lozim.
  • Tashkilotlar esa WAF’dan tashqari qo‘shimcha xavfsizlik qatlamlarini qo‘llashlari kerak (CSP siyosati, kod sanitizatsiyasi, muntazam testlar).

Tadqiqot yana bir bor shuni ko‘rsatadiki, himoya tizimlari qanchalik kuchli ko‘rinsa ham, ular mukammal emas. Tajribali hujumchilar oddiy tafovutlardan foydalanib, eng qat’iy xavfsizlik devorini ham yorib o‘tishi mumkin. Shu sababli, WAF — yakka himoya emas, balki keng qamrovli kiberxavfsizlik strategiyasining faqat bir qismi sifatida qaralishi lozim.